Dashavatara Stotram - 3 (Sri Vedanta Desika Krutam)
dēvō naḥ śubhamātanōtu daśadhā nirvartayan bhūmikāṁ
raṅgē dhāmani labdhanirbhararasairadhyakṣitō bhāvukaiḥ |
yadbhāvēṣu pr̥thagvidhēṣvanuguṇān bhāvān svayaṁ bibhratī
yaddharmairiha dharmiṇī viharatē nānākr̥tirnāyikā || 1 ||
nirmagnaśrutijālamārgaṇadaśādattakṣaṇairvīkṣaṇai-
-rantastanvadivāravindamahanānyaudanvatīnāmapām |
niṣpratyūhataraṅgariṅgaṇamithaḥ pratyūḍhapāthaśchaṭā-
-ḍōlārōhasadōhalaṁ bhagavatō mātsyaṁ vapuḥ pātu naḥ || 2 ||
avyāsurbhuvanatrayīmanibhr̥taṁ kaṇḍūyanairadriṇā
nidrāṇasya parasya kūrmavapuṣō niḥśvāsavātōrmayaḥ |
yadvikṣēpaṇasaṁskr̥tōdadhipayaḥ prēṅkhōlaparyaṅkikā-
-nityārōhaṇanirvr̥tō viharatē dēvaḥ sahaiva śriyā || 3 ||
gōpāyēdaniśaṁ jaganti kuhanāpōtrī pavitrīkr̥ta-
-brahmāṇḍaḥ pralayōrmighōṣagurubhirghōṇāravairghurghuraiḥ |
yaddaṁṣṭrāṅkurakōṭigāḍhaghaṭanāniṣkampanityasthiti-
-rbrahmastambamasaudasau bhagavatī mustēva viśvambharā || 4 ||
pratyādiṣṭapurātanapraharaṇagrāmaḥ kṣaṇaṁ pāṇijai-
-ravyāt trīṇi jagantyakuṇṭhamahimā vaikuṇṭhakaṇṭhīravaḥ |
yatprādurbhavanādavandhyajaṭharā yādr̥cchikādvēdhasāṁ
yā kācit sahasā mahāsuragr̥hasthūṇā pitāmahyabhūt || 5 ||
vrīḍāviddhavadānyadānavayaśōnāsīradhāṭībhaṭaḥ
traiyakṣaṁ mukuṭaṁ punannavatu nastraivikramō vikramaḥ |
yatprastāvasamucchritadhvajapaṭīvr̥ttāntasiddhāntibhiḥ
srōtōbhiḥ surasindhuraṣṭasu diśāsaudhēṣu dōdhūyatē || 6 ||
krōdhāgniṁ jamadagnipīḍanabhavaṁ santarpayiṣyan kramā-
-dakṣatrāmiha santatakṣa ya imāṁ triḥsaptakr̥tvaḥ kṣitim |
dattvā karmaṇi dakṣiṇāṁ kvacana tāmāskandya sindhuṁ vasan
abrahmaṇyamapākarōtu bhagavānābrahmakīṭaṁ muniḥ || 7 ||
pārāvārapayōviśōṣaṇakalāpārīṇakālānala-
-jvālājālavihārahāriviśikhavyāpāraghōrakramaḥ |
sarvāvasthasakr̥tprapannajanatāsaṁrakṣaṇaikavratī
dharmō vigrahavānadharmaviratiṁ dhanvī sa tanvīta naḥ || 8 ||
phakkatkauravapaṭ-ṭaṇaprabhr̥tayaḥ prāstapralambādaya-
-stālāṅkasya tathāvidhā vihr̥tayastanvantu bhadrāṇi naḥ |
kṣīraṁ śarkarayēva yābhirapr̥thagbhūtāḥ prabhūtairguṇai-
-rākaumārakamasvadanta jagatē kr̥ṣṇasya tāḥ kēlayaḥ || 9 ||
nāthāyaiva namaḥ padaṁ bhavatu naścitraiścaritrakramai-
-rbhūyōbhirbhuvanānyamūni kuhanāgōpāya gōpāyatē |
kālindīrasikāya kāliyaphaṇisphārasphaṭāvāṭikā-
-raṅgōtsaṅgaviśaṅkacakramadhurāparyāyacaryāya tē || 10 ||
bhāvinyā daśayā bhavanniha bhavadhvaṁsāya naḥ kalpatāṁ
kalkī viṣṇuyaśaḥ sutaḥ kalikathākāluṣyakūlaṅkaṣaḥ |
niḥśēṣakṣatakaṇṭakē kṣititalē dhārājalaughairdhruvaṁ
dharmaṁ kārtayugaṁ prarōhayati yannistriṁśadhārādharaḥ || 11 ||
icchāmīna vihārakacchapa mahāpōtrin yadr̥cchāharē
rakṣāvāmana rōṣarāma karuṇākākutstha hēlāhalin |
krīḍāvallava kalkavāhana daśākalkinniti pratyahaṁ
jalpantaḥ puruṣāḥ punanti bhuvanaṁ puṇyaughapaṇyāpaṇāḥ || 12 ||
vidyōdanvati vēṅkaṭēśvarakavau jātaṁ jaganmaṅgalaṁ
dēvēśasya daśāvatāraviṣayaṁ stōtraṁ vivakṣēta yaḥ |
vaktraṁ tasya sarasvatī bahumukhī bhaktiḥ parā mānasē
śuddhiḥ kā:’pi tanau diśāsu daśasu khyātiḥ śubhā jr̥mbhatē || 13 ||
iti śrīmadvēṅkaṭanāthasya vēdāntācāryasya kr̥tiṣu daśāvatāra stōtram |
